Loading...

Sunday, February 19, 2012

MGENI KWETU NYUMBANI

Shikamoo

Unashangaa nini?


Msiba kwetu nyumbani


Kisiwani mwa amani


Kizazi hadi kizazi



Sisi tumeuzoea…



Mgeni kwetu nyumbani


Kamwe si hayawani


Twamthamini mgeni


Kuliko hata mwenyeji



Sisi tunampokea…



Biashara kwetu ndani


Haikosi mshitiri


Bara hata visiwani


Nyanda juu hadi pwani



Sisi tunaiwezesha…



Walokuja kwa jahazi


Wakisukumwa na kusi


Wa merikebu za mbali


Mizinga zikisheheni



Sisi tuliwaitika…



Wengine wakichuuza


Na baadhi kulowea


Bara wakitangatanga


Kuzitafuta ngawira



Sisi tuliwaonyesha…



Nasi hatukukaidi


Kuwapokea kwa jadi


Walipoibisha hodi


Na misafara kuhodhi



Sisi tuliwapenyeza…



Hatukuuanza leo


Ukuwadi tufanyao


Tulianzia na hongo


Kwa kila jino la tembo



Sisi tulijitwalia…



Mambo yalipogeuka


Tukageuzwa ngawira


Ndiposa wenye dhamana


Bei walipotupiga



Sisi tuliwahofia…



Ni hawa hawa wakuu


Wa jana na leo yetu


Wanaofanya mizungu


Kutugeuza vizuu



Sisi tunawatazama…



Wametuweka jamvini


Kututia msibani


Tulie kwa ufakiri


Na mali zetu lukuki



Sisi tumehamanika…



Leo ushangae nini


Kwani ulikuwa wapi


Nyuki wakipigwa moshi


Na kulala usingizi



Sisi tukisuasua…



Masega yalipovunjwa


Na asali ikarinwa


Na wanapozindukana


Nta wakasake tena



Sisi tulinung’unika…



Lini tutakuwa mbogo


Tuyakatae makombo


Tukashikane mikono


Tusitoe shikamoo?



Sisi tunajiuliza!



©demere kitunga, 2012

0 comments:

Karibu kwenye ulingo wa kutafakari kuhusu tunapotoka,tulipo,tuendako na namna ambavyo tutafika huko tuendako/Welcome to a platform for reflecting on where we are coming from, where we are, where we are going and how we will get there

  © Blogger templates 'Neuronic' by Ourblogtemplates.com 2008

Back to TOP