Loading...

Saturday, April 19, 2014

Wengi Wape Wachache Waachie?

Chuki hizi msidhani
Hazina udini ndani,
Maana behewa hili
Lina watu kila hali

Wamo na maaskofu,
Na mashehe watukufu;
Na wasomi wa sharia,
Na wachumi wetu pia,
Kila mtu ana lwake,
Anazo sababu zake.

...

Wamo na watu wajinga,
Wanodhani wakitenga
Tanganyika iwe pake,
Ina Serikali yake,
Nchi haitavunjika,
Ila itaimarika.

Wangasema hawataki
Kutuletea hilaki,
Bali kwa ujinga wao
Tukaangamizwa nao,
Wao na wanoania
Wote ni wamoja pia,
Na njia ya jahanama
Imejaa nia njema.

Wamo na waso wajinga
Wanokusudia janga,
Ila wao wanadhani
Sisi ndio punguani

Kwa ulozi wa maneno
Ati "ndani ya Mwungano",
Watulaze usingizi,
Waleta maangamizi.

Mumo humo pia wamo
Wasio na msimamo,
Wanofuata mkumbo
Kwa hili na kila jambo.

Upepo uvumiako
Ndiko nao waendako,
Kwao hiki ni kimbunga,
Ni hatari kukipinga!

...

Wamo walopungukiwa
Au kuchanganyikiwa,
Waliomo behewani
Bila kujua kwa nini.

Wamo behewani humo
Wenye dhiki na urumo,
Wanodhani watashiba
Tukitana na Zanziba

Wamo na wengine tena,
Watu aina aina
Kiwauliza sababu,
Hawana la kukujibu.

Wamo na watu wabaya,
Wawi, wana wa hizaya,
Ni watu wanochukia
Umoja wa Tanzania,
Sasa wamepata mwanya
Ili kutuparaganya.

WOTE, na wasonia,
Watavunja Tanzania,
WOTE, na watoumia,
Wamo wanashangilia.

Wanabomoa misingi,
Na sisi hatuwapingi,
Tubaki ni kunyamaa
Na kushikilia paa,
Jumba kitakapoomoka,
Nani atasalimika?

...

Wala msidhani ati
"Kwenda kwenda na wakati'
Kila mara ni halali,
Hata kwa mambo batili.

...

Mtayumba na wakati,
Bila dira bila dhati?
Mkondo uvutiako,
Nanyi mkokotwe kuko?

Sera mpya kila mara,
Kufuata mazingira,
Kama vitenge na kanga,
Au rangi za kinyonga?

...

Mawi hayawi matamu
Kwa kupendwa na kaumu,
Wala sumu kuwa uki
Kwa kupendwa na malaki

Hata yaletayo janga,
Hatuwezi kuyapinga?
Yangatukusa balaa
Ni mwiko kuyakataa?

Hata yanayobwaga zani?
Yangatwingiza vitani?
Yakishapendwa na watu,
Kupinga hatuthubutu?

Wengi wakichachamaa,
Watakalo watatwaa,
Ila si kweli kusema
Daima hutaka mema

Wengi wakishaamua
Mama yako kumuua,
Kwa kuwa wao ni wengi,
Utashiriki, hupingi?
...

Yako mambo ya msingi,
Yasiyotegemea wingi,
Yanotaka msimamo,
Wengi wangawa hawamo.

Ungebaki peke yako,
Kupinga ni wajibiko,
Ungafa uwe mhanga,
Huna budi kuyapinga.

Ni moja ni kama lino
La kuvunja Muungano,
La kujenga uhasama
Katika jamii nzima.

La kuiga Wasomali
Kama watu majuhali,
La kufanya Tanzania
Iwe Yugoslavia.

La kufuata Warusi
Hata katika maasi,
La kuvunja vunja Dola,
Turudie makabila.

LINGEPENDWA NA KAUMU
BADO NI JAMBO HARAMU.

...

Nimewambia wenzangu:
Ningebaki peke yangu,
Nitapinga' Nitapinga
Tanganyika kujitenga!
...

Julius K. Nyerere (1993: 16-32) Tanzania! Tanzania! (TPH)

0 comments:

Karibu kwenye ulingo wa kutafakari kuhusu tunapotoka,tulipo,tuendako na namna ambavyo tutafika huko tuendako/Welcome to a platform for reflecting on where we are coming from, where we are, where we are going and how we will get there

  © Blogger templates 'Neuronic' by Ourblogtemplates.com 2008

Back to TOP