Loading...

Friday, July 22, 2016

Jipu Kuu Kutumbuliwa na Gamba Gumu Kuvuliwa?

Jipu Kuu 

Kuna jipu na majipu, matabibu hutujulisha
Lipo lilo kama upupu, huwasha kwa bashasha! 
Ukubwae wa kikapu, hutuvimbia kama kasha
Kuu hili la Majipu, lini tatumbuliwa Asha?

Lishaiva hilo jipu, mbona bado twajipasha?
Au hadi twanguke pu, ndo twache kulilisha?
Hatuuchoki huu utupu, wauchekao Watasha?
Kuu hili la Majipu, lini tatumbuliwa Asha?

E Mtumbua Majipu, twaona rasha rasha
Sasa situmie diripu, wasiseme la hasha!
Libane kama tiripu, litoboke bila kubisha
Kuu hili la Majipu, lini tatumbuliwa Asha?

Uchungu wa vijipu, asiyeujua Washawasha
Muwashwa wa Kishapu, utungu wamtosha!
 Jipu Kuu la Majipu, lioshwe kama Muosha
Kuu hili la Majipu, lini tatumbuliwa Asha?

© Malenga Mdadisi

---

Jipu Hilo Jipu Gani?

Jipu Hilo jipu gani
Jipu lisilo na haiba
Jipu lisilo utani
Wala homa nasaba

Jipu liko ndani
Sistimu hukuna uhaba
Jipu limejaa uvundo usoni
Jipu lazima litumbuliwe

Bara na pwani
Mashariki kusini
Magharibi kaskazini
Mtumbuaji ashike pini
Huruma asiweke moyoni
Apasue jipu pwaaaa

Usaha uondoe nukhsani
Taifa letu adhimu
Lifurahie neema ya Mola mwenye Imani
Alotupa dhahabu na madini
Mito, mabonde, na mengi milimani
Hala Hala Watanzania, 
Shangilia awamu yenye nidhamu

© Leila Sheikh

1 comments:

mlowezi swakala August 10, 2016 at 7:54 AM  

nimeona blog yako unajitaidi, www.mloweziswakala.blogspot.com hebu cheki hiyo

Karibu kwenye ulingo wa kutafakari kuhusu tunapotoka,tulipo,tuendako na namna ambavyo tutafika huko tuendako/Welcome to a platform for reflecting on where we are coming from, where we are, where we are going and how we will get there

  © Blogger templates 'Neuronic' by Ourblogtemplates.com 2008

Back to TOP